दिव्यांगांसोबत वाढदिवस...

    असा ही वाढदिवस...

    वाढदिवस आणि केक या दोघांचं अलीकडे घट्ट नातं आहे. वाढदिवस म्हटला की तो केक शिवाय साजरा करणे म्हणजे अवघडच. मात्र या गोष्टीला  बगल देत दिव्यांगांसोबत वाढदिवस साजरा करतांना विशेष आनंद वाटला.

      पालघर जिल्ह्यातील दिव्यांगांसाठी कार्यरत असलेल्या आमच्या वंदेमातरम अंध-अपंग सेवाभावी संस्थेच्या माध्यमातून गेल्या सात-आठ वर्षांपासून आमचे विविध उपक्रम सुरू आहेत. मात्र गेल्या दोन वर्षांच्या कोरोनाच्या कालावधीमध्ये या उपक्रमांमध्ये खंड पडला. दिव्यांगां मार्फत चालवत असलेली आमची खानावळ बंद झाली. आता अगरबत्ती, मेणबत्ती, पेपरडिश आदी बनवण्याचे काम थोड्याफार प्रमाणात सुरू आहे. मात्र गेल्या दोन वर्षांपासून आमच्या गाठीभेटी फार कमी झाल्या. वंदे मातरम अंध-अपंग सेवाभावी संस्थेचे विद्यमान अध्यक्ष श्री. विनोद राऊत सर नेहमी संपर्कात असतात. पण वेळेअभावी भेटता येणे शक्य होत नाही. गेल्या दोन दिवसांपूर्वी राऊत सरांचा फोन आला की सर आपण कधी भेटणार आहात? मी दोन दिवसांनी भेटू असे सहजच सांगितले. राऊत सर म्हणजे अत्यंत हुशार व्यक्ती. कोणत्याही गोष्टीचा पाठपुरावा कसा करावा हे त्यांच्याकडून शिकण्यासारखे आहे. त्यांच्या संपर्कात असलेल्यांना याची कल्पना असेलच. दोन दिवसांनी अपेक्षेप्रमाणे  त्यांचा फोन आला. मीही येतो असे म्हटलं.

    संस्थेचे सफाळे येथे एका जीर्ण आणि मोडकळीस आलेल्या अशा वास्तूमध्ये कार्यालय आहे. या कार्यालयातच स्वयंरोजगाराचे काम चालते. मात्र ज्या दिवशी मी संस्थेच्या कार्यालयात जाणार होतो तो दिवस होता १६ जून म्हणजेच माझा वाढदिवस. या दिवशी संस्थेच्या  कार्यालयात स्वयंसेवक म्हणून काम करणाऱ्या दिव्यांगांना रिकाम्या हाती कसं भेटावं हा प्रश्न माझ्यासमोर होताच. मी एक शक्कल लढवली. राऊत सरांना संस्थेमध्ये किती स्वयंसेवक असतील त्यांची संख्या विचारली. आणि माझ्या एका खाणावळ चालवत असलेल्या मित्राला जेवणाची ऑर्डर दिली.

          दुपारी दीडच्या सुमारास मी आणि माझा मित्र संस्थेच्या कार्यालयात गेलो. तोपर्यंत जेवणाची ऑर्डर दिलेला खानावळवाला ही जेवण घेऊन आला होता

एका बाजूने सोशल मीडियावर सकाळपासून माझ्या वाढदिवसाच्या शुभेच्छांचा वर्षाव सुरू होता. मात्र सोशल मीडियापासून दूर असलेल्या आमच्या दिव्यांग बंधू-भगिनींना याची कुठल्याही प्रकारे कल्पना नव्हती.

       दरम्यान, गेल्या मार्च महिन्यामध्ये माझ्या आजीचे दुःखद निधन झाले होते. तेव्हापासून मी संस्थेच्या कार्यालयात गेलो नव्हतो. संस्थेचे अध्यक्ष राऊत सरांनी मी तीन महिन्यानंतर कार्यालयात येणार असल्याने शोकसभा आयोजित केली होती . शोक सभेनंतर जेवणाचा कार्यक्रम सुरू झाला. मात्र जेवणाच्या कार्यक्रमापूर्वी माझ्या मित्राला राहावले नाही. त्यांनी माझा वाढदिवस ही आज असल्याचे सांगताच सर्व दिव्यांग बंधू-भगिनींनी केक आणण्याचा आग्रह केला. मात्र मी त्याला नकार दिला. आयुष्यात प्रथमच अशा पद्धतीने वाढदिवस साजरा करतांना अंतकरण आनंदाने भरून आले. दिव्यांग बंधू- भगिनींच्या सुद्धा चेहऱ्यावर आनंदाची छटा उमटलेल्या बघून खूप समाधान वाटले.

- प्रमोद पाटील, पालघर