गुरुकुल उपक्रमशील शिक्षक समूहाचा असाही आदर्श

गुरुकुल खरात कुटुंबिय सहाय्य निधीचे जालना येथे वितरण

--------------------------

 पालघर (प्रमोद पाटील ) ता.11 ऑक्टोबर 2016 

आत्ताच्या आधुनिक व तंत्रज्ञानाच्या युगात समाजात माणुसकी हरवत चालली आहे अशी ओरड आपण नेहमीच ऐकत असतो. तसेच सोशल नेटवर्किंग मुळे नवीन पिढी बरबाद होत आहे अशी ही ओरड एका बाजूने सुरू असताना एका निराधार कुटुंबाला केवळ "गुरुकुल व्हाॅटसअप ग्रूप" च्या माध्यमातून सुमारे 55,555/_ रूपयांची रोख रक्कम देऊन समाजात माणूसकी अजूनही शिल्लक आहे हे दाखवून दिले आहे. 

        मराठवाडयातील जालना जिल्ह्य़ातील जाफराबाद येथील समर्थ विद्यालयात विना अनुदानित शाळेत कार्यरत असलेल्या गजानन विठोबा खरात या शिक्षकाचा विना अनुदानित शाळांना अनुदान मिळावे या करिता औरंगाबाद येथे आंदोलन करित असतांना शुक्रवार दि.10 जुन 2016 रोजी अत्यंत दुर्दैवी मृत्यू झाला. खरात यांच्या पश्चात त्यांची आई चंद्रकला विठोबा खरात (वय 56), पत्नी सुकेशनी (वय 24) व मुलगा यश(वय 3) असा परिवार असून गजानन खरात यांच्या पश्चात कमावणारी व्यक्ती कुटुंबात नसल्याने या कुटुंबावर मोठे संकट कोसळले. ही घटना संपूर्ण राज्यभर वाऱ्यासारखी पसरली होती. 

   तसेच गजानन खरात यांची शेत जमीन नसल्याने आणि ते विना अनुदानित शाळेत नाममात्र मानधनावर काम करत असल्याने कुटूंबाचा उदरनिर्वाह करणे कठीण झाले होते. म्हणून ते शाळेच्या वेळे व्यतिरिक्त मोलमजुरी करून आपल्या कुटुंबाचा उदरनिर्वाह करीत होते. तसेच गावापासून शाळेपर्यंत सुमारे सहा किलोमीटर अंतर ते दररोज पायी ये- जा करत असत.  मात्र त्यांच्या मृत्यूनंतर  कुटुंबाचा आधारच निखळला. संपूर्ण कुटुंबच निराधार झाले आहे. 

      सदर वृत्त "गुरुकुल" व्हाॅटसअप ग्रूप वर सविस्तर टाकण्यात आले. तदनंतर "गुरुकुल सहाय्य निधी समिती" स्थापन करून या समितीच्या माध्यमातून "गुरुकुल खरात कुटुंबिय सहाय्य निधी" जमा करण्यात आला.  या ग्रूपच्या माध्यमातून स्व इच्छेने शिक्षकांनी पाचशे रुपयांपासून दोन ते अडीच हजार रुपयांपर्यंत रक्कम जमा करण्यात आली. 

      ही जमा झालेली रूपये, 55,555/_ रक्कम मयत शिक्षक गजानन खरात  यांच्या जालना जिल्ह्य़ातील जाफराबाद (वरखेडा)या त्यांच्या मुळगावी जाऊन त्यांच्या पत्नी व आई यांच्या हाती गुरूवारी (ता.10) गुरुकुल सहाय्य निधी समितीचे डॅरेल डिमेलो, प्रमोद पाटील, विलास पाटील,संजय पाटील, राम पाटील, सुधाकर ठाकूर आदी शिष्टमंडळांनी सुपूर्द केली. या वेळी गावचे पोलीस पाटील विठ्ठल डवणे, सामाजिक कार्यकर्ते गजानन उबाळे, मधुकर खरात, प्रकाश राऊत आदी उपस्थित होते.या बहुमुल्य मदतीबद्दल खरात यांच्या पत्नी व आई  यांनी सर्व शिक्षकांचे आभार व्यक्त केले .

     यापुढेही जर एखाद्या शिक्षकाच्या बाबतीत अशी दुर्दैवी घटना घडली आणि कुटूंबापुढे आर्थिक संकट उभे राहिले तर मदतीचा हात देण्याचा मनोदय शिक्षकांनी व्यक्त केला आहे. शिक्षकांची संवेदनशिलता वरील उदाहरणातून दिसुन येते. प्राचीन काळापासुन शिक्षकांची समाजाप्रती असलेली माणूसकिची भूमिका आजही दिसून येते.अध्यापना बरोबरच शिक्षक समाजात आदर्श निर्माण करण्यासाठी व समाज हितासाठी मेहनत घेतात.

            #असाही प्रसंग-

गुरुकुल सहाय्य निधीचे वितरण खरात यांच्या घरी जाऊन त्यांच्या पत्नी व आई यांच्या कडे करण्याचे ठरले. बुधवारी(ता.9 ऑक्टोबर 2016)सकाळी पालघर वरून आम्ही जालना कडे निघालो.  गुरुवारी(ता.10) दुपारी बाराच्या सुमारास जाफराबाद येथे पोहोचलो. सदर गाव जाफराबाद पासून सहा किलोमीटर अंतरावर असून या गावात कार जात नाही. या कामी येथील सामाजिक कार्यकर्ते गजानन उबाळे यांनी गावातून तीन मोटारसायकल मागवून आम्हाला खरात यांच्या घरी नेले. मात्र मयत शिक्षक गजानन खरात यांच्या तीन वर्षांच्या मुलाला निमोनिया झाल्याने त्यांच्या पत्नी बाळाला घेऊन सुमारे चाळीस किलोमीटर अंतरावर असलेल्या चिखली(विदर्भ) येथील दवाखान्यात  होत्या. घरी गजानन खरात यांच्या आई व गावातील काही प्रतिष्ठित व्यक्ती होत्या. त्यांच्या बरोबर हितगुज केली असता खरात कुटुंबाला राहायला झोपडी साठी एका व्यक्तीने जागा दिली आहे. या झोपडीची खुपच दयनीय अवस्था आहे. 

      तदनंतर आम्ही तेथून चाळीस किलोमीटर अंतरावर असलेल्या चिखली येथील दवाखान्यात जाऊन खरात यांच्या पत्नी व आजारी असलेला त्यांचा मुलगा यश ला जाऊन भेटून त्यांच्या भावना जाणून घेतल्या.  

         - #खरात कुटुंबाची मागणी-

घरातील कमावणारी व्यक्ती गेल्याने मयत शिक्षक गजानन खरात यांच्या पत्नी सुकेशनी खरात यांना सरकारी नोकरीत सामावून घ्यावे अशी मागणी खरात कुटुंबियांकडून करण्यात येत आहे.

    या वेळी पालघर येथून गेलेल्या गुरुकुलच्या शिक्षक कार्यकर्त्यांना भावना आवरणे कठीण झाले होते.