.... अखेर जोई बनला सर्वांचाच लाडका

.... अखेर जोई बनला सर्वांचा लाडका

 पालघर (प्रमोद पाटील)

       पालघर मधील ताराबाग येथील मुक्ताई बंगलो येथे राहणाऱ्या पाटील कुटुंबियांच्या लाडक्या जोई या कुत्र्याचा आज सोमवार दिनांक 5 ऑक्टोबर रोजी पहिला वाढदिवस. त्यानिमित्त घेतलेला आढावा.              

        ताराबाग मध्ये राहत असलेल्या आणि इंजिनिअरिंगचे शिक्षण घेत असलेल्या श्रेयस पाटील याला पाळीव प्राण्यांची खूप आवड आहे. त्यांनी 17 नोव्हेंबर 2019 मध्ये जोई या गोल्डन रिट्रीवर जातीच्या कुत्र्याला आपल्या घरी आणले. त्यावेळी जोई अवघा 42 दिवसांचा होता. घरी आणल्यानंतर अवघ्या काही दिवसातच जोई हा पाटील कुटुंबियाचा एक महत्वाचा घटक बनला. लहान मुलांचा तर तो खूपच लाडका झाला. हळूहळू सर्व पाटील कुटुंबियांचा जोई वर लळा लागला.  

असा आला जोई मुक्ताई कुटुंबात ... 

        पालघर येथील ताराबाग भागात मुक्ताई कुटुंब राहत आहे. श्रेयसचे वडील आणि आई दोघेही शिक्षक आहेत. गेल्या वर्षी म्हणजेच 19 ते 26 नोव्हेंबर 2019 या कालावधीसाठी या दोघांनाही इंडोनेशिया देशातील बाली येथील शैक्षणिक परिषदेला उपस्थित राहायचे होते. या परिषदेला राज्यातील फक्त उपक्रमशील शिक्षक जाणार होते. शैक्षणिक परिषद असल्याने इंडोनेशिया येथे मुलांना घेऊन जाणे शक्य नव्हते. त्यामुळे मुलांनी एक शक्कल लढवली. आम्ही परिषदेला येणार नाही मात्र आम्हाला एक गोष्ट द्यायची आहे आणि ती म्हणजे घरामध्ये एका कुत्र्याला आणण्याची परवानगी. नाईलाजाने मुलांना परवानगी देण्यात आली. अशा रीतीने जोई चे 17 नोव्हेंबर 2019 रोजी अनपेक्षितपणे मुक्ताई कुटुंबात आगमन झाले. 

 मुलांचीच जबाबदारी... 

  मोठ्यांची इच्छा नसतानासुद्धा अगदीच एक दीड महिन्याच्या लहान जोई ला (कुत्र्याच्या पिल्ल्याला) घरी आणल्यापासून श्रेयस त्याची बहीण ऋत्वि आणि चुलत बहिणी आर्या आणि आभा या चौघांनी जोई ला खायला देण्यापासून त्याची आंघोळ करणे, त्याला कपडे घालणे, वेळच्या वेळी डोस देणे, त्याला वॉकला घेऊन जाणे, त्याच्याबरोबर खेळणे आदी जबाबदारी घेऊन त्याची काळजी घेत आहेत. आज जोई हा पाटील कुटुंबियांचा एक सदस्यच बनला आहे. 

 खाऊच्या पैशातून जोईचा खर्च... 

     या चारही मुलांनी आपले खाऊचे पैसे वाचवून जोई ला लागत असलेल्या गोष्टी जसे त्याचे खाणे, त्याला झोपायला लागणारी गादी, त्याला वॉकला घेऊन जाणे,  त्याला वेगवेगळ्या डोससाठी होणारा खर्च आदी खर्च त्यांनी साठवून ठेवलेले पिगी बँकेतून करत आहेत. 

 लॉकडाऊन चा जोईला फायदाच ... 

  covid-19 मुळे गेल्या मार्च महिन्यापासून आजतागायत शाळा- महाविद्यालये बंद असल्याने मुलं घरूनच ऑनलाइन पद्धतीने शिक्षण घेत आहेत. त्यामुळे जोईला वेळच्यावेळी खाण देणं किंवा त्याची काळजी घेणे मुलांना सोपे झाले आहे. कोविडमुळे बऱ्याच घटकांना जरी फटका बसला असला तरी जोईला मात्र त्याचा फायदाच  झाला आहे.