पालघर जिल्हा कलाध्यापक संघाच्या अध्यक्षपदी वाणगाव येथील ज. म. ठाकुर विद्यालयाचे कलाशिक्षक रूपेश वझे यांची सोमवारी (ता.3) निवड झाली. ते पालघर- ठाणे जिल्हा माध्यमिक शिक्षक संघटनेचे एक सक्रिय कार्यकर्ते म्हणून परिचयाचे आहेत.
महाराष्ट्र राज्य कलाध्यापक संघ महामंडळ पुणे यांच्याशी संलग्न असलेल्या पालघर जिल्हा कलाध्यापक संघाची निर्मिती 1 ऑगस्ट 2014 रोजी पालघर जिल्ह्याची निर्मिती झाल्यानंतर लगेच करण्यात आली. जिल्हा निर्मितीनंतर लगेच ठाणे जिल्हा कलाध्यापक संघातून वेगळे होऊन प्रफुल्ल घरत यांच्या अध्यक्षतेखाली नव्याने पालघर कलाध्यापक संघाची स्थापना झाली. घरत यांच्या सेवानिवृती नंतर गेल्या तीन वर्षापासून माहीम येथील भुवनेश किर्तनेे विद्यालयाचे कलाशिक्षक विनय पाटील यांनी संघाची यशस्वी धुरा सांभाळली. विनय पाटील यांनी राजीनामा दिल्याने रिक्त झालेल्या अध्यक्षपदी संघाचे उपाध्यक्ष वझे यांची सर्वानुमते निवड करण्यात आली. ते विविध शैक्षणिक संघटनांशी संबंधित असून शाळाबाह्य मुलांना शाळेच्या प्रवाहात आणण्याचं बालरक्षकचे अत्यंत महत्त्वाचे काम ते करत आहेत.
गेल्या सहा वर्षांपासून कलाध्यापक संघाच्यावतीने
जिल्हास्तरीय कृतिसत्राचे नियमित आयोजन केले जाते. राज्य अधिवेशनात पालघर संघाचा मोठा सहभाग असतो. संघातर्फे मुलांसाठी रंगभरण, भेटकार्ड तयार करणे, आकाश कंदिल स्पर्धा इ. उपक्रमाचे आयोजन केले जाते. तर कलाशिक्षकांसाठी फलक लेखन स्पर्धा, पोस्टर स्पर्धा यांचे आयोजन करून त्यांनाही प्रोत्साहन दिले जाते. दरवर्षी जिल्ह्यातील तीन कला शिक्षकांना जिल्हास्तरीय आदर्श कलाशिक्षक पुरस्कार दिला जातो. गेल्या काही दिवसांपूर्वी मयत कलाशिक्षक कै.गंगाराम चौधरी यांच्या कुटुंबियांना आर्थिक मदत करून त्यांच्या कुटुंबियांना सहकार्य केले आहे.
वझे यांच्या निवडीबद्दल सोशल मीडियावर अभिनंदन होत असून यांच्याकडून संघाचे विविध उपक्रम प्रभावीपणे राबवण्याची अपेक्षा शिक्षकांकडून व्यक्त केली जात आहे.
- प्रमोद पाटील,
एम.ए.बी.एड.
पालघर
Comments
Post a Comment