मातृभाषेतूनच सर्वोत्कृष्ट शिक्षण ; प्रमोद पाटील, मनोर येथील लालबहाद्दूर शास्त्री हायस्कूलमध्ये कार्यक्रम
शिक्षणावर अपेक्षित खर्च आवश्यक ; प्रमोद पाटील
मनोर येथील लालबहाद्दूर शास्त्री हायस्कूलमध्ये कार्यक्रम
मनोर
आंतरराष्ट्रीय स्तरावर शिक्षणाला अनन्यसाधारण महत्त्व दिले जात असताना आपल्या देशात मात्र शिक्षणावर अपेक्षित खर्च होत नाही. असा अभ्यासक्रम असायला हवा की शिक्षणातून खरा माणूस घडून त्याला योग्य व्यवसाय करण्यासाठी चालना मिळायला हवी असे परखड मत इंडोनेशिया येथील आंतरराष्ट्रीय शैक्षणिक परिषदेत पालघर जिल्हयाचे नेतृत्व केलेल्या राज्य आदर्श शिक्षक पुरस्कार प्राप्त शिक्षक प्रमोद पाटील यांनी मांडले आहे.
मनोर येथील जनरल एज्युकेशन सोसायटीच्या लालबहाद्दूर शास्त्री हायस्कूल व चाफेकर कनिष्ठ महाविद्यालयाचा शुक्रवारी ( ता.14) वार्षिक पारितोषिक वितरण आणि इयत्ता दहावीच्या विद्यार्थ्यांचा निरोप समारंभ मोठ्या उत्साहाने पार पडला. यावेळी प्रमुख वक्ते म्हणून प्रमोद पाटील उपस्थित होते. पुढे बोलताना पाटील यांनी परदेशात आपल्या भाषेत शिक्षण घेण्याची सोय उपलब्ध आहे. आपण मात्र इंग्रजी माध्यमाचा उगाचच अधिकच बाऊ करत असून मातृभाषेतूनच सर्वोत्कृष्ट शिक्षण मिळू शकते असे सांगून परदेशी शिक्षण पद्धती आणि भारतीय शिक्षण पद्धतीमधील फरक स्पष्ट केला.तसेच विद्यार्थ्यांना परिस्थितीला दोष न देता सकारात्मक विचार करून जीवनात मार्गक्रमण करा असा सल्ला दिला.
या कार्यक्रमाला प्रमुख पाहुणे म्हणून उपस्थित असलेल्या आमदार राजेश पाटील यांनी विद्यार्थ्यांना तुमचे निरामय जीवन शालेय स्तरावर संपले असून पुढील जीवनात जिद्द आणि संघर्ष करण्यासाठी सदैव तयार राहा.परिश्रम हीच यशाची गुरू किल्ली आहे हे विसरू नका असे सांगितले.तर विशेष अतिथी म्हणून उपस्थित असलेल्या जिल्हा परिषद सदस्य विष्णू कडव यांनी विद्यार्थ्यांनी नेहमी नम्र राहून चांगल्या गोष्टी साठी मोबाईल चा वापर करावा असे सांगून विद्यार्थ्यांना शुभेच्छा दिल्या.
या वेळी इयत्ता दहावी च्या बोर्डाच्या परिक्षेत गेल्या वर्षी नेत्रदीपक यश मिळवून शाळेचे नाव उज्ज्वल केलेल्या विद्यार्थ्यांना विविध दात्यांकडून रोख रक्कम पारितोषिक म्हणून देऊन मान्यवरांच्या हस्ते गौरवण्यात आले.
या कार्यक्रमाचे प्रास्ताविक शाळेचे मुख्याध्यापक अशोक भामरे यांनी केले. तर पाहुण्यांचा परिचय महेश भोईर यांनी केला. संस्थेचे सचिव संजय मळेकर, अध्यक्ष सुनिल लोखंडे यांनी मार्गदर्शन केले.
या वेळी संस्थेचे उपाध्यक्ष संजय चंपानेकर,खजिनदार रविंद्र घोलप, शालेय समितीचे अध्यक्ष संतोष लोखंडे, संस्थेचे माजी अध्यक्ष राजाभाऊ एडवणकर, सतिश लोखंडे, प्रशांत घोसाळकर व आजी माजी पदाधिकारी, सदस्य,दोन्ही शाळांचे मुख्याध्यापक, शिक्षक आणि विद्यार्थी उपस्थित होते.
चौकटीत-
बोईसर विधानसभेचे नवनिर्वाचित आमदार राजेश पाटील यांनी पालघर जिल्हयात लवकरच पाईप लाईनने गॅस पुरवठा केला जाईल असे सांगून जिल्हयात शिक्षणाची अवस्था गंभीर झाली आहे या बाबतीत लक्ष दयावे लागेल असे आश्वासन दिले
Comments
Post a Comment