लॉक डाऊनच्या काळात पालघरच्या भगिनी समाज शाळेचा अभिनव उपक्रम

लॉक डाऊनच्या काळात पालघरच्या भगिनी समाज शाळेचा अभिनव उपक्रम

 प्रमोद पाटील

 पालघर 

      पालघर येथील भगिनी समाज संस्था संचलित, प्राथमिक विद्यामंदिर भगिनी समाज या शाळेतील शिक्षक लॉक डाऊनच्या काळात 'वर्क फ्रॉम होम' करीत आहेत.शाळेतील उपक्रमशील शिक्षकांनी लॉक डाऊन च्या काळामध्ये विद्यार्थी आणि पालकांना अभ्यासासाठी प्रोत्साहित केले आहे.

              या शाळेतील उपक्रमशील शिक्षक Testmoze.com या लिंकवरून प्रश्न निर्मिती करून ऑनलाइन चाचणी तयार करतात. तयार केलेल्या चाचणीची लिंक इयत्ता १ली ते ७ वी पर्यंतच्या वर्गानुसार पालकांच्या व्हाट्सअप ग्रुपवर ती चाचणी प्रसारीत करतात. दिलेल्या लिंकवर टच केल्याबरोबर चाचणीचे पेज ओपन होते .त्यात विद्यार्थ्यांचे पूर्ण नाव लिहून Start बटन दाबले की १० ते १५ प्रश्नांची चाचणी उपलब्ध होते .सदर चाचणीत वस्तुनिष्ठ प्रश्नावलीतील बहुपर्यायी प्रश्न दिलेले आहेत .त्यातील अचूक उत्तर निवडून चाचणी सोडवल्यावर Submit बटन दाबल्यावर विद्यार्थ्यांनी सोडवलेल्या प्रश्नांची बरोबर उत्तरे व चुकलेली उत्तरे पहावयास मिळतात . विशेष म्हणजे या चाचणीत दिलेल्या प्रश्नांमधील चुकलेल्या उत्तरांची बरोबर उत्तरे सुद्धा पहावयास मिळतात. तसेच चाचणीचा निकालही टक्केवारी मध्ये पाहायला मिळतो. त्यामुळे विद्यार्थ्यांना व पालकांना ही ऑनलाईन चाचणी सोडवताना अत्यंत आनंद होत होत असल्याचे पालकांचे म्हणणे आहे.

                 भगिनी समाज शाळेच्या मुख्याध्यापिका प्रिती वर्तक यांनी शाळेतील सर्व शिक्षकांना ऑनलाइन चाचणीबद्दल मार्गदर्शन केले . त्यामुळे शाळेतील उपक्रमशील शिक्षकांनी मराठी, हिंदी, इंग्रजी, गणित ,विज्ञान, इतिहास ,भूगोल व सामान्य-ज्ञान तसेच व्याकरणावर आधारीत मूलभूत क्षमताधिष्टित संकल्पनेवर घटकनिहाय प्रश्नांची चाचणी तयार करून प्रसारीत करतात. त्यामुळे या ऑनलाइन चाचणीला विद्यार्थ्यांचा प्रचंड प्रतिसाद मिळत आहे.

             प्राथमिक विद्यामंदिर भगिनी समाज शाळेचे यंदाचे हे शैक्षणिक वर्ष सुवर्ण महोत्सवी वर्ष म्हणून साजरे केले जात आहे . त्यामुळे या शैक्षणिक वर्षात शाळेमध्ये विविध उपक्रम साजरे करण्यात आले आहेत. त्यापैकी 'धागा शौर्याचा- राखी अभिमानाची', विकास घर संकल्पना, तालुकास्तरीय- वक्तृत्व स्पर्धा, काव्यगायन स्पर्धा, कथाकथन स्पर्धांचे आयोजन, रंगबिरंगी रिंग कवायत, विज्ञान प्रदर्शन आणि माजी विद्यार्थ्यांचा स्नेहमेळावा अशाप्रकारे विविध स्तुत्य कार्यक्रमांचे आयोजन करण्यात आले होते. आजघडीला भगिनी समाज शाळेने पालघर शहरातील मराठी माध्यमाची एक नामांकित अग्रगण्य शाळा म्हणून नावलौकिक मिळविलेला आहे. भगिनी समाज संस्था ही महिला मंडळामार्फत चालवली जाणारी संस्था आहे . या संस्थेचे बालमंदिर, प्राथमिक व माध्यमिक असे तीन विभाग असून यात पालघर पंचक्रोशीतील जवळपास १५०० विद्यार्थी शिक्षणाचे धडे गिरवत आहेत. या शाळेमध्ये ज्ञानरचनावादावर आधारीत तंत्रस्नेही व प्रयोगशील शिक्षकांच्या परिणामकारक अध्ययन-अध्यापन प्रक्रियेमुळे विद्यार्थ्यांचा सर्वांगीण विकास घडून येण्यास मदत होत आहे. १९७० साली स्थापन झालेल्या प्राथमिक विद्यामंदिर भगिनी समाज शाळेचे अनेक माजी विद्यार्थी समाजात अनेक मोठमोठ्या हुद्यावर कार्यरत आहेत .सध्या लॉक डाऊन काळात विद्यार्थ्यांचे शैक्षणिक नुकसान होऊ नये म्हणून राबवित असलेल्या 'ऑनलाइन चाचणी' सह अनेक अभिनव उपक्रमांबद्दल संस्थेचे पदाधिकारी व शाळेच्या मुख्याध्यापिका प्रिती वर्तक तसेच सर्व उपक्रम उपक्रमशील शिक्षकांचे परिसरातून कौतुक होत आहे.

 प्रतिक्रिया :-

            "आमच्या शाळेचे शिक्षक हे नेहमीच वेगवेगळे उपक्रम राबववित असतात. त्यांनी घेत असलेल्या मेहनतीमुळेच विद्यार्थ्यांचा सर्वांगीण विकास घडून येत आहे. म्हणूनच आमची शाळा सुवर्णमहोत्सवी वर्षात पदार्पण करीत  प्रगतीपथावर चालत आहे."

        - माधुरी परूळेकर

     अध्यक्षा,भगिनी समाज संस्था

               "शिक्षकांना दिलेल्या वेळापत्रकाप्रमाणे चाचणी तयार करतात. पालकांच्या व्हाट्सअप ग्रुप वरून प्रसारीत करतात. त्यामुळे विद्यार्थ्यांचे शैक्षणिक नुकसान होत नाही. शिक्षण विभागाने दिलेल्या सूचनांचे आम्ही पालन करतो. आमची शाळा विद्यार्थ्यांचा सर्वांगीण विकास साधत सुवर्ण महोत्सवी वर्षातून पदार्पण करीत आहे .याचा आम्हांला आनंद आहे."

       - प्रिती वर्तक

मुख्याध्यापिका, प्रा.वि.मं.भगिनी समाज.

                " लॉक डाऊन मध्ये शाळेने आँनलाइन चाचणी उपक्रम सुरु केल्याने आमच्या मुलांचे शिकणे हे चालूच आहे. व्हाट्सअपवर चाचणी सोडवताना मुलांना व आम्हांला देखील खुप आनंद होत आहे. त्यामुळे मी सर्व पालकांतर्फे शाळेचे आभार मानते ."

          - स्मिता पाटील.

     पालक प्रतिनिधी, इ.६ वी- अ