सफाळयातील बनावट नोटा बनवणारयांवर कारवाई, चौघांना अटक

सफाळयातील बनावट नोटा बनवणारयांवर कारवाई, चौघांना अटक

प्रमोद पाटील
केळवे वार्ताहर ता.9

 सफाळे रेल्वे स्थानकाच्या पूर्वेला असलेल्या सोनावे येथील धोदडीपाड्यात भारतीय चलनातील बनावट चलनी नोटा बनवणारया चौघांना पोलिसांनी शुक्रवारी ( ता. 8) मुद्दे मालासह अटक केली आहे.

    सोनावे येथील धोदडीपाड्यातील नथुराम सिन्या दुमाडा( वय 48) याच्या घरी पर प्रांतीय बालराज बालाप्पा गुडसे( वय 44),अब्राहम सतीराजू चित्तांपल्ली( वय 37), राजगोपाळराव विरराजू सुरमपुडी ( वय 44) हे चौघे एकमेकांच्या संगनमताने नथुरामच्या घरी भारतीय चलनातील बनावट नोटा बनवून त्या चलनात वापर करत असल्याची खबर पोलिसांना मिळाली होती. त्या खबरी नुसार पोलिसांनी शुक्रवारी (ता.8 ) सकाळी 6 वाजून दहा मिनिटांनी धाड टाकली असता त्या ठिकाणी बनावट दोन हजार रूपयांच्या नोटा बनवण्यासाठी लागणारे केमिकल साधन सामुग्री तसेच दस्तऐवज यांचा वापर करून भारतीय चलनात बनावट चलनी नोटा व त्या तयार करण्यासाठी वापरत असलेले वेगवेगळ्या प्रकारचे साहित्य सापडले. यावेळी पोलिसांनी आरोपींकडून सुमारे 12,030 रूपयांचा किंमती माल जप्त केला.  

  सदर प्रकरणी सफाळे पोलिस ठाण्यात गुन्हा दाखल करण्यात आला असून चारही आरोपींना सफाळे येथील पोलिस ठाण्यात अटक करण्यात आली आहे. 

  सदरची कारवाई स्थानिक गुन्हे शाखेचे पोलिस निरीक्षक जितेंद्र वनकोटी  व त्यांच्या सहकार्यांनी केली. 

  दरम्यान, बनावट चलनी नोटांचे अजून काही धागेदोरे हाती येतात का? या बाबतीत पोलिस प्रयत्न करत आहेत.