रायगड जिल्हा परिषदेच्या
शिक्षकांना दिलासा मिळणार
आमदार निरंजन डावखरे यांच्या पाठपुराव्याने विविध निर्णय
प्रमोद पाटील
केळवे वार्ताहर ता. 18
: रायगड जिल्ह्यातील शिक्षकांना दिलासा देणारे अनेक निर्णय जिल्हा परिषदेकडून घेण्यात आले आहेत. जिल्हा परिषदेतील ११६ शिक्षकांचे वरिष्ठ वेतनश्रेणीचे प्रस्ताव ३० नोव्हेंबरपर्यंत मंजूर करण्याबरोबरच वैद्यकीय बिले मंजूर करण्यासाठी उद्यापासून विशेष शिबिर घेण्यात येणार आहे. कोकण पदवीधर मतदारसंघातील भाजपचे आमदार निरंजन डावखरे यांच्या पाठपुराव्याने विविध निर्णय झाले आहेत.
रायगड जिल्ह्यातील शिक्षकांचे प्रलंबित प्रश्न सोडविण्यासाठी आमदार निरंजन डावखरे यांच्या मागणीनुसार जिल्हा परिषदेच्या मुख्यालयात सहविचार सभा घेण्यात आली. या सभेला जिल्हा परिषदेचे उपाध्यक्ष आस्वाद पाटील, जिल्हा परिषदेचे मुख्य कार्यकारी अधिकारी अभय यावलकर, शिक्षणाधिकारी भाऊसाहेब थोरात यांच्यासह वेतन पथकाचे अधिकारी उपस्थित होते. या सभेला शिक्षक परिषद व अन्य शिक्षक संघटनांचे प्रतिनिधींचीही उपस्थिती होती.
जिल्हा परिषदेच्या ११६ शिक्षकांचे वरिष्ठ वेतनश्रेणी प्रस्ताव प्रलंबित असल्याकडे आमदार डावखरे यांनी लक्ष वेधले. त्यानंतर येत्या ३० नोव्हेंबरपर्यंत सर्व शिक्षकांचे वरिष्ठ वेतनश्रेणी प्रस्ताव मंजूर करण्याचा निर्णय घेण्यात आला. अनेक शिक्षकांची वैद्यकीय बिले रखडली आहेत. या बिलांना मंजूरी देण्यासाठी विशेष शिबिर घेण्याचे निर्देश मुख्य कार्यकारी अधिकारी अभय यावलकर यांनी दिले. अंशकालीन निवृत्तीवेतन योजनेतील १ हजार ८२३ शिक्षकांच्या स्लिपांचे वाटपही केले जाणार आहे. संस्थेतील वादामुळे बढती रखडलेल्या शिक्षकांबाबत सरकारी नियमानुसार आठ दिवसांत निर्णय घेतला जाईल. तसेच निवृत्त व ५५ वर्षांवरील शिक्षकांनी एमएससीआईटी प्रशिक्षण न केल्याने होणारी वसुली थांबविण्याचाही निर्णय घेण्यात आला. मुल्यांकन पात्र शाळांचे प्रस्ताव लगेचच उपसंचालकांकडे पाठवावे, ३० जूनपूर्वी २०१६ पूर्वी सेवेत आलेल्या शिक्षकांना टीईटी उत्तीर्ण होण्यासाठी तीन संधी द्याव्यात, अल्पसंख्याक शाळातील अनुकंपा नियुक्तीला मान्यता, १३ शाळांचे दर्जावाढ करण्याबाबत प्रस्ताव त्वरीत उपसंचालकांकडे पाठविणे, मूल्यांकनास पात्र शाळांचे प्रस्ताव लगेचच सरकारकडे पाठविणार आदी महत्वपूर्ण निर्णय घेण्यात आले. या सभेत काही शिक्षकांकडून वैयक्तीक मान्यता, शिक्षण सेवक सातत्य, शालार्थ आयडी आदींबाबतही मागण्या करण्यात आल्या. त्याबाबत लवकरात लवकर निर्णय घेण्याचे आश्वासन देण्यात आले.
अन्य जिल्ह्यातून रायगड जिल्ह्यात समायोजन झाल्यानंतर आंतरजिल्हा बदली झालेल्या शिक्षकांना मुक्त करण्यात येईल, असे मुख्य कार्यकारी अधिकारी यावलकर यांनी स्पष्ट केले. न्यायालयीन निर्देशानुसार शिक्षकांसाठी जुनी पेन्शन योजना सुरू करण्यात येईल, असे यावलकर यांनी स्पष्ट केले.
----------------------------
रायगडमधील शिक्षकांना
दुय्यम सेवा पुस्तिका
रायगड जिल्ह्यातील शिक्षकांना दुय्यम सेवापुस्तिका देण्यात येणार आहे. या संदर्भात शिक्षणाधिकाऱ्यांकडून मुख्याध्यापकांना पत्र पाठविले जाणार आहे. त्यानंतर शिक्षकांना दुय्यम सेवा पुस्तिका उपलब्ध होतील. काही वेळा सेवापुस्तिका गहाळ झाल्यामुळे शिक्षकांची अडचण होत होती. मात्र, आता शिक्षकांकडे दुय्यम प्रत राहणार आहे.
Comments
Post a Comment